நாளை (23.01.2026) வவுனியாவில் தரப் பரிசோதனை நிலைய திறப்பு விழாவும், உற்பத்தியாளர் சந்தையும்.

இலங்கையில் அண்மைக் காலங்களில் ஏற்பட்டுவரும் பொருளாதார நெருக்கடிகளும், அடிக்கடி நிகழும் இயற்கை அனர்த்தங்களும், நாட்டின் பொருளாதார கட்டமைப்பை மீளாய்வு செய்ய வேண்டிய அவசியத்தை வலியுறுத்துகின்றன. இத்தகைய சூழலில், தன்னிறைவு பொருளாதாரத்தை நோக்கி பயணிப்பதுடன், ஏற்றுமதி நோக்கிய உற்பத்தித் தொழில்களில் தீவிரமாக ஈடுபடுதலே எமது நாட்டை நிலையானதும் நீடித்ததுமான அபிவிருத்திப் பாதையில் இட்டுச் செல்லக்கூடிய முக்கிய தொழில்முயற்சிப் பங்களிப்பாக விளங்குகிறது.

ஆனால், சந்தைப் போட்டிகளை எதிர்கொள்வதிலும், ஏற்றுமதி தரநிர்ணயங்களை பூர்த்தி செய்வதிலும் வவுனியா மாவட்ட தொழில்முயற்சியாளர்கள் பல்வேறு பெரும் சவால்களை எதிர்நோக்கி வருகின்றனர். குறிப்பாக, உற்பத்திகளுக்கான தரநிர்ணய பரிசோதனைகள் மற்றும் சட்டரீதியான அனுமதிகளைப் பெற்றுக்கொள்வதில் நிலவும் இடர்பாடுகள், அவர்களின் முன்னேற்றப் பாதையில் பெரும் தடையாக இருந்து வருகின்றன. இலங்கை சட்டங்களுக்கு அமைவாக, எந்த ஒரு உற்பத்திப் பொருளும் சந்தையை அடைவதற்கு முன், அவசியமான உற்பத்தி லேபிள்கள் மற்றும் தரச்சான்றிதழ்கள் பொறிக்கப்பட வேண்டிய கட்டாயம் உள்ளது.

இதனைப் பெறுவதற்காக கொழும்பு அல்லது யாழ்ப்பாணம் போன்ற மாவட்டங்களுக்கு பயணம் செய்ய வேண்டிய நிலை, அதனுடன் தொடர்புடைய செலவுகள், நிர்வாகச் சிக்கல்கள் மற்றும் போதிய விழிப்புணர்வின் பற்றாக்குறை ஆகிய காரணங்களால், பல தொழில்முயற்சியாளர்கள் தங்களது முயற்சிகளை ஆரம்பித்த நிலைமையிலேயே பல ஆண்டுகளாகத் தடுத்து நிறுத்தப்பட்டவர்களாகவே உள்ளனர். இதன் விளைவாக, அவர்களின் உற்பத்தி நடவடிக்கைகள் வணிக நோக்கிலான தொழில்முயற்சியாக வளர்ச்சியடையாமல், வாழ்வாதார மட்டத்திலேயே முடங்கிக் காணப்படுகின்றன.

இந்நிலைமை, தனிப்பட்ட தொழில்முயற்சியாளர்களின் வளர்ச்சிக்கு மட்டுமல்லாது, இலங்கையின் தேசிய பொருளாதார அபிவிருத்திக்கும், குறிப்பாக வவுனியா மாவட்டத்தின் பிரதேச அபிவிருத்திக்கும் பெரும் தடைக்கல்லாகவும், காலம் கடந்து தீர்வு காணப்பட வேண்டிய முக்கிய சவாலாகவும் இன்றுவரை நிலவி வருகிறது.

வவுனியா மாவட்டத்தின் தொழிற்துறை அபிவிருத்தியைப் பொருத்தவரை, தொழிற்துறை சார்ந்த அரச திணைக்களங்களின் செயற்பாடுகளும், வவுனியா பல்கலைக்கழகத்தின் அறிவியல்-ஆதார பங்களிப்பும் அளப்பரிய முக்கியத்துவம் பெறுகின்றன. இவ்விரண்டும் இணைந்து செயல்படும் போது, மாவட்டத்தின் தொழில்முயற்சித் திறனையும், உற்பத்தி வளங்களையும் புதிய உயரங்களுக்கு உயர்த்தும் வல்லமை பெற்றதாக காணப்படுகிறது.

அதிலும் குறிப்பாக, வவுனியா பல்கலைக்கழகத்தின் UBL (University Business Linkage) அலகு, வவுனியா மாவட்டத்தின் தொழிற்துறை வளர்ச்சிக்கான ஒரு வலுவான தூணாக விளங்குகிறது. இவ்வலகு, மாவட்டத் தொழிற்துறையை முன்னேற்றும் பாரிய அபிவிருத்தி திட்டங்களை அடையாளம் காணுதல், அவற்றை திட்டமிட்ட முறையில் வடிவமைத்தல், கட்டமைத்தல் மற்றும் நடைமுறைப்படுத்தல் ஆகிய செயல்முறைகளில் முன்னோடிப் பங்காற்றி வருகிறது. கல்வி, ஆய்வு மற்றும் தொழில் உலகம் ஆகியவற்றுக்கிடையே வலுவான இணைப்பை ஏற்படுத்தி, தொழில்முயற்சியாளர்களுக்கான நிலையான வளர்ச்சி வாய்ப்புகளை உருவாக்குவதில் UBL அலகின் பங்களிப்பு மிகச் சிறப்பானதும் குறிப்பிடத்தக்கதுமானதாகும்.

இதனூடாக, வவுனியா மாவட்டத்தின் தொழிற்துறை அபிவிருத்தி முயற்சிகள் தனித்தனி நடவடிக்கைகளாக அல்லாமல், நீடித்ததும் விளைவுள்ளதுமான ஒருங்கிணைந்த அபிவிருத்தி பாதையாக மாற்றம் பெறுகின்றன.

முக்கியமாக, இத்திட்டத்தை வவுனியா மாவட்டத்திற்கு கொண்டு வருவதிலும், அதன் நடைமுறைப்படுத்தல் மற்றும் வெற்றிகரமான செயல்பாட்டிலும் அளப்பரிய அக்கறையும் அர்ப்பணிப்பையும் வெளிப்படுத்தியவர்களாக, வவுனியா பல்கலைக்கழகத்தின் துணைவேந்தர் சிரேஷ்ட பேராசிரியர் திரு. அற்புதராஜா அவர்களை முதன்மையாகக் குறிப்பிட வேண்டியதாக உள்ளது.

அத்துடன், வவுனியா பல்கலைக்கழகத்தின் முயற்சியாண்மை மற்றும் சிறுவியாபார முகாமைத்துவம் கற்கைநெறியின் இணைப்பாளர் திரு. ப. சசிதரன் அவர்களும், வியாபார இணைப்பு அலகின் பணிப்பாளர் திருமதி. சசிதரன் மதிவதனி அவர்களும், மேலும் விதாதா வள நிலையம் – வவுனியாவின் மாவட்ட உத்தியோகத்தர் திரு. ம. தவேந்திரன் அவர்களும், இத்திட்டம் வெற்றிகரமாக உருவாகவும் செயல்படுத்தப்படவும் முக்கிய பங்காற்றிய முக்கிய நபர்களாகக் குறிப்பிடத்தக்கவர்கள்.

அவர்களது ஒருங்கிணைந்த முயற்சிகளும், தொலைநோக்கு சிந்தனையும், கல்வி–அரசு–தொழில் துறை இணைப்பின் வலிமையை உறுதிப்படுத்தும் ஒரு சிறந்த முன்மாதிரியாக அமைந்து, வவுனியா மாவட்டத்தின் தொழிற்துறை அபிவிருத்தி பயணத்திற்கு உறுதியான அடித்தளமாக விளங்குகின்றன.

அந்த வகையில், வவுனியா மாவட்டத்தின் தொழிற்துறை அபிவிருத்தியை அடுத்த கட்டத்துக்கு முன்னெடுத்துச் செல்லும் முக்கிய வளர்ச்சிப் படியாக, விஞ்ஞான மற்றும் தொழில்நுட்ப அமைச்சின் விதாதா (Vidatha) அலகும், வவுனியா பல்கலைக்கழகமும் இணைந்து, உற்பத்திகளுக்கான தரச்சான்றிதழ் பெறுவதற்கான பரிசோதனை மற்றும் மேம்பாட்டு மையமாகச் செயல்படும் Incubation Centre ஒன்றை நிறுவியுள்ளது.

இந்த மையம், வவுனியா பல்கலைக்கழகத்தின் பூங்கா வீதியில் அமைந்துள்ள பிரதான வளாகத்திலே உருவாக்கப்பட்டு, மாவட்ட தொழில்முயற்சியாளர்களுக்கான தரநிர்ணயச் சேவைகளை அவர்களது சொந்த மாவட்டத்திலேயே பெறக்கூடிய வரலாற்றுச் சிறப்பு வாய்ந்த வாய்ப்பாக அமைந்துள்ளது.

ஆரம்ப கட்டமாக, உணவு உற்பத்திகளுக்கான Color Code (Sugar, Salt, Fat) பரிசோதனைகள் மற்றும் உணவுப் போஷாக்கு (Nutrition) மதிப்பீட்டு பரிசோதனைகள் மேற்கொள்ளுவதற்கான தேவையான தொழில்நுட்ப வசதிகளும், கட்டமைப்புகளும் இம்மையத்தில் உருவாக்கப்பட்டுள்ளன. இதனூடாக, உள்ளூர் உணவு உற்பத்தியாளர்கள் இலங்கை அரசின் சட்டப்பூர்வ தரநிர்ணயங்களை எளிதாகவும், குறைந்த செலவிலும் பூர்த்தி செய்து, தங்களது உற்பத்திகளை சந்தை மற்றும் ஏற்றுமதி நிலைகளுக்குத் தயாராக்கும் வாய்ப்பு உருவாகியுள்ளது.

இம்முயற்சி, வவுனியா மாவட்டத்தை ஒரு தொழிற்துறை–அறிவியல் இணைந்த அபிவிருத்தி மையமாக மாற்றும் முக்கிய அடையாளமாகவும், மாவட்ட பொருளாதார வளர்ச்சிக்கான வலுவான அடித்தளமாகவும் விளங்குகிறது.

இக்குறித்த நிலையத்தின் அங்குரார்பண நிகழ்வு, நாளை 23.01.2026 (வெள்ளிக்கிழமை) காலை 9.00 மணிக்கு, வவுனியா நகரின் பூங்கா வீதியில் அமைந்துள்ள வவுனியா பல்கலைக்கழக வளாகத்தில் சிறப்பாக நடைபெறவுள்ளது.

இந்நிகழ்வினை மேன்மைபெறச் செய்யும் வகையில், கைத்தொழில் மற்றும் தொழில்முயற்சியாண்மை அபிவிருத்தி அமைச்சின் கௌரவ அமைச்சர் திரு. சுனில் ஹந்துன்நெத்தி அவர்களும், விஞ்ஞான மற்றும் தொழில்நுட்ப அமைச்சின் கௌரவ அமைச்சர் பேராசிரியர் கிருஷாந்த அபேசேன அவர்களும் பிரதம விருந்தினர்களாக கலந்து கொண்டு நிகழ்வினை சிறப்பிக்கவுள்ளனர்.

மேலும், வவுனியா மாவட்டச் செயலாளர் திரு. பி. ஏ. சரத்சந்திர அவர்களுடன், பல்வேறு அரச திணைக்களங்களைச் சேர்ந்த உயர்மட்ட அதிகாரிகள், கல்வியாளர்கள் மற்றும் தொழிற்துறை பிரதிநிதிகள் ஆகியோரும் இந்நிகழ்வில் கலந்து கொண்டு தமது கௌரவமான பங்களிப்பை வழங்கவுள்ளனர்.

இந்நிகழ்வு, வவுனியா மாவட்டத்தின் தொழிற்துறை அபிவிருத்தி பயணத்தில் ஒரு வரலாற்றுச் சிறப்பு வாய்ந்த மைல்கல்லாக அமைவதுடன், கல்வி–அரசு–தொழில் துறை இணைப்பின் வலிமையை வெளிப்படுத்தும் ஒரு முக்கிய தருணமாகவும் விளங்கும்.

மேலும், 23.01.2026 அன்றைய தினம், தெரிவுசெய்யப்பட்ட உயர்தர உற்பத்திகளை மேற்கொள்ளும் தொழில்முயற்சியாளர்களின் தரமான உள்ளூர் உற்பத்திகளை பொதுமக்கள் நியாயமான விலையில் பெற்றுக்கொள்ளும் வகையில் ஒரு சிறப்பு சந்தை நிகழ்வு ஏற்பாடு செய்யப்பட்டுள்ளது.

இச்சந்தை நிகழ்வு, வவுனியா நகரின் பூங்கா வீதியில் அமைந்துள்ள வவுனியா பல்கலைக்கழக வளாகத்திற்கு எதிரே உள்ள திறந்த வெளி அரங்க வளாகத்தில் நடைபெறவுள்ளது.

அத்துடன், தொழில்நுட்பம் சார்ந்த புதுமை முயற்சிகள், உற்பத்தி மேம்பாட்டு தீர்வுகள் மற்றும் அறிவியல்–தொழில்நுட்பக் காட்சிப்படுத்தல்களைக் கொண்ட பல்வேறு கூடங்களும் (Stalls) இந்நிகழ்வில் அமைக்கப்படவுள்ளன. இதன் மூலம், தொழில்முயற்சியாளர்கள், மாணவர்கள் மற்றும் பொதுமக்கள் அனைவரும் புதிய அறிவு, சந்தை அனுபவம் மற்றும் தொழில்நுட்பத் திறன்களை ஒரே இடத்தில் பெற்றுக்கொள்ளும் வாய்ப்பு உருவாக்கப்பட்டுள்ளது.

எனவே, வவுனியா மாவட்டத்தின் தொழிற்துறையை ஊக்குவிக்கும் இந்த வரலாற்றுச் சிறப்பு வாய்ந்த நிகழ்வில் அனைவரையும் அன்புடன் அழைத்து நிற்கிறோம்.

உள்ளூர் உற்பத்திகளை ஆதரிப்பதன் மூலம், தொழில்முயற்சியாளர்களை வலுப்படுத்தி, வவுனியா மாவட்டத்தின் நிலையான தொழிற்துறை வளர்ச்சிக்கான எமது பங்களிப்பை ஒன்றிணைந்து நல்குவோம்.